ဇူလိုင် ၂၆ – ၂၀၂၅
SN (VOM)
ကယားပြည်နယ်၊ ဒီးမော့ဆိုမြို့နယ်အတွင်းက နန်းမယ်ခုံမြို့ဝန်းကျင်မှာ စစ်ရေးတင်းမာပြီး တိုက်ပွဲဖြစ်မှာစိုးရိမ်တာကြောင့် နန်မယ်ခုံမြို့နဲ့ ကျေးရွာပေါင်း ၅၀ ကျော်က ဒေသခံတွေဟာ မနေ့ ဇူလိုင် ၂၅ ရက်ကစပြီး အရေးပေါ် ရွှေ့ပြောင်းနေရတယ်လို့ ကူညီပေးနေသူတွေဆီက သိရပါတယ်။
ဖယ်ခုံ – မိုးဗြဲ – လွိုင်ကော် လမ်းမကြီးတလျှောက်ကို နစကတပ်က ထိန်းချုပ်ပြီးနောက် နန်းမယ်ခုံမြို့နယ်အနီးကို ထပ်မံ နယ်မြေရှင်းလင်းရေး လုပ်ဆောင်လာတဲ့အတွက် ဒေသခံတွေ တိမ်းရှောင်နေရတာ ဖြစ်တယ်လို့ သိရပါတယ်။
“အခုက နန်းမယ်ခုံတမြို့လုံးပဲ ပြောရမယ်။ အကုန်လုံး စစ်ရှောင်တာပါ။ ဖြစ်လာမှ ရှောင်တာထက် ကြိုရှောင်ထားတာ အကောင်းဆုံးပဲလေ။ ညကလည်း တညလုံးပဲ လက်နက်ကြီးနဲ့ ပစ်နေတာ အိမ်တွေပါတုန်တယ်။ အခု နစကတပ်တွေက ကယား ညေးခူကို ရသွားပြီ။ ဘုရားနီရွာနားကို ရောက်နေပြီ။ ဘုရားနီနဲ့ နန်းမယ်ခုံက နှစ် မိုင်လောက်ပဲ ဝေးတော့တာ” လို့ ကူညီပေးနေသူက ပြောပါတယ်။
လက်ရှိမှာတော့ နယ်မြေရှင်းလင်းရေး လုပ်ဆောင်လာတဲ့ နစကတပ်နဲ့ ဒေသတွင်း လက်နက်ကိုင် တပ်တွေဟာ ဘုရားနီကျေးရွာမှာ တိုက်ပွဲ ဖြစ်ပွားနေတယ်လို့ သူက ပြောပါတယ်။
နစကတပ်ဟာ ပြီးခဲ့တဲ့ ဇူလိုင် ၇ ရက်နေ့က ရှမ်း – ကယားနယ်စပ် မိုးဗြဲမြို့ကို ပြန်လည် ထိန်းချုပ်လိုက်ပြီဖြစ်ကြောင်း သတင်း ထုတ်ပြန်ပြီးနောက် နန်းမယ်ခုံမြို့နယ်ဘက်ကို စစ်ဆင်ရေး လုပ်ဆောင်လာတာ ဖြစ်တယ်လို့ သိရပါတယ်။
“အခု အခြေအနေက လွိုင်ကော်မြို့နဲ့ နန့်မယ်ခုံမြို့ကြားမှာ စစ်ရေးတင်းမာနေတယ်။ စစ်ကြောင်းက မိုးဗြဲပြီးတော့ မိုးဗြဲနဲ့လွိုင်ကော်ကြားက ကုန်းသာရွာကို ရပြီးတော့ နန်းမယ်ခုံဘက်ကို ဦးတည်လာတာ။ လူတွေအရင် ရောက်မလာဘဲ ဒရုန်းရော၊ လက်နက်ကြီးရော တောက်လျှောက် သုံးပြီးမှ လူတွေက နောက်က လိုက်လာတာ။ ဒါကြောင့် တမြို့လုံး စစ်ရှောင်ရတာ။ စစ်ရှောင်ဦးရေက ရာနဲ့ချီရှိတယ်” လို့ သူက ပြောပါတယ်။
လက်ရှိမှာ အရေးပေါ် ရွေ့ပြောင်းလိုက်ရတဲ့ ဒေသခံတွေအနေနဲ့ နေထိုင်ရေးအတွက် အခက်အခဲတွေ ရှိနေပြီး ရိက္ခာနဲ့ မိုးကာတွေ လိုအပ်လျက်ရှိတယ်လို့ သူက ပြောပါတယ်။
လက်ရှိ စစ်ရှောင်နေရတဲ့ ကျေးရွာအုပ်စုတွေက ပြည်သူတွေဟာ လယ်ယာစိုက်ပျိုးမှုကို အဓိက လုပ်ကိုင်ကြသူတွေဖြစ်ပြီး မိုးစပါးစိုက်ပျိုးချိန် ပျိုးခင်းတွေကို ဒီအတိုင်း ထားခဲ့ရတယ်လို့ ဆိုပါတယ်။
ရှောင်တိမ်းရတဲ့ ကျေးရွာအုပ်စုတွေက ပြည်သူတွေအတွက် ဒေသဆိုင်ရာ တာဝန်ရှိသူတွေက ဘေးလွတ်ရာနေရာတွေ စီစဉ်ပေးထားပြီး ပြောင်းရွှေ့နိုင်ဖို့ ကူညီပေးနေတာ ဖြစ်တယ်လို့ သိရပါတယ်။
နန်းမယ်ခုံဟာ အရင်က ဒီးမော့ဆိုမြို့နယ်ထဲမှာ ပါဝင်ပေမယ့် ကရင်နီပြည် ကြားကာလ အုပ်ချုပ်ရေးကောင်စီ (IEC) လက်ထက်မှာ မြို့နယ်အဖြစ် သီးခြား သတ်မှတ်ထားတဲ့ ဒေသတခု ဖြစ်တယ်လို့ သိရပါတယ်။
Photo – CJ
